جِــرَاح
جِــرَاح
ــــــــــــــــــــــــ
شباب عَانا
وسامْـعَانا
ودان الصخر
ومش عايز
يعيش عاجز
فـ قلب القهر
وبينادي
سما بلادي
تمطر زَهر
وفـ المينا
شباب قرر يفارقنا
مهو عايش مغلبنا
رِكب مركب
رحل لبعيد
وشايفينُه
فـ بحرُه وَحيد
وشايفنا
وبينادي
على أهلُه
وأصحابُـه
ومين فـ الغَرقه يسمَع له
ولو حتى فـ اصلابُه
واحبابُه
بعيد عنه
مَهوْ فاتهم
وفات أُمُه
وجينا نبُص جُوانا
لقينا حياتنا سارْقانا
وسِكّينا فينـ ا تفكت
بتدبحنا
وبتموت
نوا كفاحنا
ونيجي نعد فـ جراحنا
نلاقي كتير
في ناس نايمة على جلودها
في برد الليل
بتتعود على تابوتها
وليلها طويل
بتستنى رغيف العيش
ولو بايت
ولو تكسير
والاقي عليها عدا البيه
ومش رايد
يجود بالـلي تسِيبُه إيديه
وجرح كمان وبيعلِّم فـِ لوْن جلدي
الاقي قلب احن الناس
بيتمنى يخون عهدي
عشان يخلص وينسى ماضيه
عشان قرشي صِغر فـِ عنيه
ولا مكفيْه
خلاص على ايه
يغور الصدق وسنينو(هـ)
ما دام جاله رغيف فينو
يبُصـ لي ليه
وفاتـ لي الصخر اعُض انا فيه
وجرح كبير بيكسْرني
بلاقي الغش فـ الدنيا
هوا عايش فـ انفسنا
وكِدب كتير بيتغربل
وبيداري تُراب فاسنا
يداري الطين
يداري الزرع
وبيغطي غيطان الحزن
يسقي الدمع
تموت الفرحة جوانا
وما تلحق يطول عودها
وبنشوفها
بتطلع روحنا فـِ صعودها
في بحر الغم
وجرح يوماتي يتجدد
على آخر شارع بيتنْا
الاقي الطبل ويا الزَمر
بيعلىَ فـ قلب حتـتنا
وناس محرومة م الفرحة
وناس عدا عليها العمر
بتكافح تشيل الصخر دايقه المر
بتحارب وعايشة الذل
وفـ همومها تِبات سارحة تناجي الصبر
وليل الصبر بيطوِّل
تِبات الدنيا قهر فـ قهر
تبات الدنيا
قهر ف قهر___________________
وما يكفيني أهديها .. ده منكم جت معانيها
لكن احبابي في الكلمة .. أكيد دنيا وما فيها
تساوي كتير عشرتنا .. ولمتـنا فـ واديها
تحياتى اسير الحب
احمد ماهر
{ أرسل تعليق }
{ الصفحة الأخيرة } { من 166 } { الصفحة التالية }
|
